ازاى ترجع موبايلك اللى اتسرق منك بخطوات بسيطه

موبايلك اتسرق وبتتصل بيه مغلق ؟!

بسم الله والصلاة والسلام على حبيبنا وشفيعنا رسول الله

السلام عليكم ورحمة الله

ازاى ترجع موبايلك اللى اتسرق منك بخطوات بسيطه جدا

اتبع الخطوات واللى اللى هاكتبهولك ده وانسى بقى تطبيقات Find My Device ولا تطبيقات المتابعه بال GPS ولا اى تطبيق  ....  

لان ببساطه اللى بيسرق موبايل اول حاجه بيعملها بيرمى الشريحه وبيفرمت الجهاز ويعمله إعادة ضبط مصنع  Factory

Reset

- ركز بقى في الخطوات الجايه دى وباذن الله تعالى هيرجعلك موبايلك بنسبه كبيره في فتره بين شهر الى 3 اشهر

وما تكلمش اى حد ويقولك انا هارجعهولك وطبعا هياخد منك اى سبوبه والموضوع غالبا بيكون نصب  وممكن أساسا لو رجعه وعجبه الموبايل هيقولك للأسف مقدرناش نوصله ويحتفظ بيه لنفسه الا مارحم ربى  وده لان الموضوع روتينى ومش هايعمل غير اللى هنقوله لوقتى



• اول شيء ما تروحش القسم وتعمل محضر مباشرة لا ببساطه تتوجه الى مباحث التليفونات اللى حضرتك تابع ليها  او بتتصل بيهم على الأرقام اللى هنذكرها  اخر الموضوع  وهما هيدلوك  تتوجه لاى مباحث تليفونات وعنوانها او تتصل ب 140 دليل التليفونات وتطلب منهم رقم مباحث التليفونات
• قبل ما تروح هناك تكون مجهز الحاجه دى  ( بطاقتك وصوره منها - علبة الموبايل ومحتوياتها الاصليه - وصوره للعلبه موضوح فيها سيريال الموبايل IEMI - ارقام الشرايح اللى كانت بالموبايل قبل ما يتسرق ) هياخدها منك الموظف هناك وهو هيعملك المحضر بنفسه نيابة عن القسم 

• تاخد رقم المحضر وتحتفظ بيه  ( مهم جدا ) اتأكد كويس من رقم المحضر والأرقام اللى انت سلمتها علشان مايبقاش عملت المحضر بارقام شرائح غير اللى كانت في الموبايل
• اتعامل مع الموظف  ده بأسلوب محترم وطيب
• انت كده خلصت مهمتك هما بيعملوا اجراءاتهم وبيحطوا سيريال الموبايل تحت المراقبه اول ما بيشتغل او يتحط فيه شريحه هيوصلهم اشاره بيها
• بيكلموا صاحب الشريحه اللى اشتغلت بالموبايل بنفسهم بيخوفوه بالذوق ويقولوله الموبايل ده متبلغ عنه ومطلوب فورا يا اما فيها حبس وطبعا بيكون ساعتها معاهم كل بيناته وبيتعاملوا معاه بصفه وديه لانه جايز يكون حد اتضحك عليه واشترى الموبايل وهو مايعرفش انه مسروق
• وقتها صاحب الشريحه اللى كلموه بيجيب الموبايل ويسلمه وساعتها امين الشرطه هيتصل بيك تحضر تستلم موبايلك
• الكلام ده بيستغرق زى ما قولنا شهر اتنين تلاته وانت وحظك في رجوع الموبايل  اما لو انت عاوز تتابع بنفسك
• يبقى تتوجه للقسم برقم المحضر اللى معاك تاخد منهم الرقم السرى للمحضر ده وبيدلوك تتابع مع انهى نيابه وبالرقم ده هيما بيقولولك حالة الكشف ( مثلا فودافون ردها سلبى / اتصالات ردها سلبى / اورانج ردها سلبى ) لحد ما يتم الرد من اى شبكه منهم ايجابى وقتها بيكون اشتغل شريحه في الموبايل بتاعك 
•  ومن الأفضل لو هتاخد الخطوه دى يبقى توكل محامى يتابعلك حالة الكشف وطبعا المحامى هياخد اتعاب لو حابب تتابع لوحدك تابع او تستنى الإجراءات لحد ما يتصلوا هما بيك اول ما يوصلوا  لنتيجه
• وساعتها بيتصوا بيك تيجى تستلم موبايلك وبتقابل الشخص اللى كان معاه الموبايل في مكتب امين الشرطه وطبعا تروح بكل احترام وادب جايز يكون الشخص ده مش هو اللى سارق أساسا وده مجرد واحد اشتراه وفى الأول والأخر انت ليك ان موبايلك يرجعلك وتقفل المحضر  ولو معجبكش حال اللى معاه الموبايل وحاسه انه الحرامى ممكن ترخم عليه وتطلب تعويض عن استهلاك الموبايل وتمضى بالاستلام وبعد كده الأمين بيوصولكم انتم الاتنين لو كيل النيابه لتأكيد عملية التسليم

اهم شيء لو حاجتك غاليه عليك ما تكسلش واعمل الخطوات دى لو الكل عمل كده محدش هيفكر وقتها يسرق موبايل لانه عارف انه لو سرق موبايل هيتجاب بيه

• ارقام مباحث التليفونات العامه  25798166/ 25771755
• ودى ارقام مباحث التيفونات للابلاغ عن الشكاوى والمضايقات والمعاكسات

02-25760502

02-27033633

02-25762846

02-25771755

لو عجبك الموضوع وحابب تفيد بيه غيرك جايز حد اتسرق موبايله ومحتاج يرجعه اعمل شير للموضوع ,,,